Ingressbiletet er av løyperekordhaldar Erik Rullestad tatt i årets Sentrumsløp. Han er ekte Rullestad-gut, født og oppvaksen i austenda av Rullestadvatnet. Rekorden er 20.57 i den særs tungløpte løypa. Laban Siro (m.a. dobbeltvinnar av Midnattsloppet i Gøteborg) er på andreplass på 21.10. (Foto: Kjell Vigestad)
Start og mål ved Halvfjordingen restaurant og camping. Så fyrst ca 1 km på asfalt, Så grus, berg, skogssti, tretrapper i tillegg til trebruer over fleire elver. Opp og ned av terrengsider. For så å avslutta med ca 700 m grusveg.
Rullestad mot Kondis
Jørgen Rullestad (bror til løyperekordhaldaren) utfordrar Kondis sin representant i Hardanger og Sunnhordland. Eller kanskje det var omvendt, at Gisle Sellvold utfordra unge Rullestad. Uansett er Gisle Sellevold rekonvalesent etter muskebrist og har ingen sjanse mot Jørgen. Men vi utfordrar alle Kondis-medlemmer til å stille og sjå om dei kan slå Jørgen.
5-års-jubileum og torgdag og fiskefestival
Oppstart i 2010 med 140 deltakarar som gjekk eller sprang den flotte løypa. Det inneber femårsjubileum sundag 13. juli.
For dei som vil vera med på gamaldags torgdag på Fjæra 3 - 4 km frå løpsområdet, så er det laurdag 12. juli. Då kan ein få med seg klede frå "gamle dagar". Og det er som sagt camping i startområdet ved Halvfjordingen, drive av Rullestad Aktiv Fritid. Same dag er det same stad ein tradisjonsrik fiskefestival.
Familievenleg tilskiping
Løypa er familievenleg. Dei i familien som ikkje vil springa kan gå løypa, og venta på løparane ute i løypa. Her er det flust med plassar ein kan stilla seg opp og få årets løpar-bilete i natusskjønne omgjevnader.
Ein kan leiga båt gratis på campingen; og auren i vatnet kan bli kjempestor... Det går også an å fiska frå kaien nede på Fjæra. Har ein høve til å overnatta er Torgdagen dagen før, eit særs familievenleg tiltak.
Den vesle tettstaden Fjæra var opp til 1942, då vegen langs Åkrafjorden (der det går løp 16. august) vart ferdig, eit livleg trafikkalt knutpunkt. Her kom ferje frå Kyrping 20 km lenger ute i Åkrafjorden. Her kom det rutebåt frå Bergen fleire gonger i veka.
Ferje og rutebåt-ekspedisjon, bensinstasjon og bilverkstad, kyrkje, post, telegraf, landhandel og eit ungdomsherberge. Litt lenger oppe i dalen skule og idrettshus for Fjæra og Rullestad IL stifta i 1939. I dag bur her berre nokre få menneske att.
JUBILEUMS-KAVALKADE I BILETE:
Th: Thomas Finshus, Stegaberg IL har vore med fleire gonger - ein solid løpar. I midten storløpar Laban Siro. Hadde løyperekorden til heimefavoritten Erik Rullestad tok rekorden i 2013. Til venstre Per Øyvind Valen, 2. plass 2012
Ein heil gjeng frå Lillomarka i Oslo sette farge på løpet i 2012.
Ikkje ukjende Nils Skutle (var tidlegare i mange år RBK-direktør) var også med i 2012 saman med sonen, Carl Magnus. Nils er oppvaksen i nabokommunen Odda.
Kjersti Fresvik, løyperekordhaldar frå Røldal, her frå eit anna løp i Gular IL si kjende drakt.
Dei fyrste vinnarane i 2010: Sølvi Markhus og Tom Steine, Hydro B.I.L. Holmestrand. Tom vann sin 100. seier i nett dette løpet.
