Artikkelen står på trykk i Kondis nr. 2-2016.
Vikenvarvet, eit lite og idealistisk løp der overskottet gjekk til kreftsaka, vil ikkje bli arrangert i år da arrangøren verken har pengar eller energi til å skifte namn og laga nye logoar. I fjor deltok 198 løparar, og overskottet på 14 200 kroner gjekk som vanleg til den lokale barnekreftforeninga. Så fekk dei brev frå Göteborgs Friidrottsforbund som arrangerer Göteborgsvarvet, om at dei ikkje lenger kan kalle Vikenvarvet for Vikenvarvet.
– Jag blev mest förbannad. Men jag tyckte också det var konstigt att Göteborgsvarvet har rätt till namnet, så under hösten kollade jag om det kunde stämma. Jag hittade då flera andra lopp som tvingats ta bort namnet «varv», fortel arrangøren av Vikenvarvet, Carin Jönsson, til svt.se og legg til:
– Det är ju bara patetiskt. Om vi bytar namn så kostar det för mycket, vi behöver ju ta fram en ny logotype och trycka material. Det äter upp all vinst och då blir det inga pengar till barncancerföreningen.
Slussvarvet i Trollhättan er eit anna lite løp som har fått trøbbel på grunn av det Göteborgsvarvet omtaler som «vern av eit varemerke som skal kunne trekkje til seg sponsorer utan forvekslingsrisiko med andre løp».
Hadde eg vori potensiell sponsor, ville slik oppførsel iallfall ikkje fått meg til å bruke pengar på Göteborgsvarvet. Sia Göteborgs Friidrottsforbund meiner det er så fort gjort å forveksle Göteborgsvarvet med Slussvarvet, kan det også hende at eg som løpar rett og slett kjem til å blingse slik at eg hoppar av toget i Trollhättan i staden for i Göteborg …
Å nekte andre løp å ha med «varvet» i namnet sitt er like dumt som om Mellerunden skulle forby alle andre turrenn i Noreg å ha eit namn som endar på «runden» – eller at Skåla Opp nekta alle andre motbakkeløp å ha med «opp» i namnet sitt.
I Sverige fanst det løp som hadde namn som enda på «varvet» før Göteborgsvarvet vart til. Eg kan ikkje anna enn seie meg samd med løparlegenda Rune Larsson som på facebook oppsummerer toskeskapen slik:
«Jag har sprungit löpartävlingar sedan 1972. Loppens namn slutade ofta på «-loppet», «-runt», «-rundan» och «-varvet». Det sistnämnda var inte ovanligt när löpartävlingen gick ett varv genom bygden. Som tur är har Lidingöloppet och Vätternrundan mera hyfs och vett än vad de styrande i Göteborgsvarvet har. Tänk er hur det skulle bli om även de började bete sig som idioter.»
Kommentaren stod på trykk i Kondis nr. 2 - 2016
