I dameklassa ligg det no an til å kunne bli ein tøff duell mellom Karoline Holsen Kyte, Førde IL, og den nye svenske favoritten Johanna Åström.
Johanna, som bur på Åndalsnes, har i år imponert med ei lang rekke suverene sigrar i ulike motbakkeløp i Noreg der ho har sett nye løyperekordar, bl. a. i Mefjellet Opp på Sunnmøre som også var NM i motbakkeløp. Der slo ho norgesmeistaren Karoline Holsen Kyte, Førde IL med 32 sek. og sletta samstundes den gamle løyperekorden til tidligare EM- og VM-vinnar i motbakkeløp, Anita Håkenstad Evertsen.
Andre løp som Johanna har sett nye løyperekordar i er bl.a. Blåmann Vertical (ved Tromsø), Varden Opp (Sula), Blåfelden Opp (Syvde) og Tromsø Skyrace.
(Foto: Christian Prestegård)
Karoline Holsen Kyte ( f. 1993) vann i 2017 ein suveren siger i La Sportiva Skåla Opp (foto over). Same året sprang Karoline seg opp i europatoppen i motbakkeløp med ein sterk 4. plass i EM i motbakkeløp der ho vart best av dei norske deltakarane. Karoline vann La Sportiva Skåla Opp i 2017 på den nest raskaste tida av ei norsk kvinne 1:22:38. verds- og europameistar Anita Håkenstad Evertsen har damerekorden på 1:20:06 frå 2008.
I år har Karoline vunne både NM og Norgescupen i motbakkeløp. Sist helg dokumenterte ho særs god form ved å vinne Norgescupen-løpet Folgefonna Opp over 3 min før Anita Iversen Lilleskare, BFG Bergen Løpeklubb. Til info vart Anita i fjor nr. 2 i Skåla Opp då løpet hadde mål ved Skålavatnet 1150 moh. I den form Karoline er no så har ho potensiale til å nærme seg løyperekorden på 1:20:06. Det potensiale har også Johanna Åström. Då må alt klaffe også med værforholda.
Andre favorittar i dameklassa er Anita Iversen Lilleskare, Annie Bersagel (USA), May Britt Buer og Eli Anne Dvergsdal. Eli Anne har vore sjuk nokre dagar og det er difor usikkert om ho kan delta. Siste nytt er at også 15-åringen Live Sollid frå Hornindal i Nordfjord skal delta. For 14 dagar sidan vart ho verdsmeistar i Ungdoms-VM i Skyrunning (Youth Skyrunning World Championships) i Italia.
På laurdag ligg det an til å bli mange endringar i lista over dei 20 beste kvinner og menn:
I herreklassa er det i år eit stort rekordsterkt felt der det er minst 10 løparar som kan vinne. Eg kan ikkje hugse at det tidlegare har vore så vanskeleg framheve ein favoritt til å vinne herreklassa som i år. Dette er utan tvil eit av dei aller sterkaste felt som har vore i La Sportiva Skåla Opp.
Sjå artikkel på Kondis.no 22. juli
og siste kondis.no artikkel om Bhim Gurung frå Nepal.
Dei 11 vinnarkandidatane er: Stian Angermund-Vik, Stian Øvergaard Aarvik, Andrew Douglas (GBR/Skottland), Johan Bugge, Ahmet Arslan (Tyrkia), Torstein Tengsareid, Thorbjørn Thorsen Ludvigsen, Weldu Negash Gebretsadik, Øyvind Heiberg Sundby, Bhim Gurung (Nepal) og Håkon Skarsholt.
Ellers må det nemnast at Noreg også fekk ein ny verdsmeistar i år i herreklassa i Ungdoms-VM i Skyrunning Vertikal i 19-åringen Per-Christian Færøvik Grieg, Varegg. Per-Christian har delteke mange år i Skåla Opp og i år kan han overraske med plassering i toppen blant alle menn.
Det er i år fleire norske motbakkeløparar som har markert seg i internasjonale meistarskap. I årets EM i motbakkeløp i Zermatt i Sveits vart Stian Øvregaard Aarvik, Gneist, nr 2. I lagkonkurransen vart Noreg nr 3 og heile det norske bronselaget deltek i La Sportiva Skåla Opp på laurdag. På bronselaget deltok Stian Øvregaard Aarvik, Johan Bugge, Torstein Tengsareid og Håkon Skarsholt.
I fjor vann Stian Øvregaard Aarvik La Sportiva Skåla Opp i den kortare utgåva Skålavatnet Opp (løypendring pga av værforholda). Håkon Skarsholt bak Stian vart nr 2 i fjor. (Foto Christian Prestegård)
