Det var femte gongen løpet vart arrangert, og deltakinga har vorti stor på kort tid. På grunn av arbeid med stien på toppen vart løypa ca. 700 m kortare enn normalt.
Blytungt
Med gode pengepremiar til dei fire beste kvinner og menn og heile 20 000 til vinnarane tiltrekk løpet seg mange av dei beste motbakkeløparane i landet. Og Thorbjørn Ludvigsen har i år vori sjef på herresida.
- Dette var veldig bra. Men eg trivst endå betre i løp der ein er i terrenget og ikkje på grusvegar. Dette var blytungt for min del, uttala vinnaren til Firda etter løpet som òg har eit lengre parti med trapper.
Torstein Tengsareid frå Egersund var ikkje meir enn 11 sekund bak medan Tjalve-løparen Øyvind Heiberg Sundby vart nummer tre, 1.17 bak.
Baneløparen Marius Vedvik prøvde seg òg på dei 700 høgdemetrane, men klarte ikkje heilt å henge med spesialistane. Han vart nummer sju, knappe 4 minutt bak vinnaren.
- Eg forsøkte å slite ut dei andre i starten, men eg enda opp med å slite ut meg sjølv. Då vart det tungt på slutten, fortalte Vedvik til Firda.
Kjempeglad
May Britt Buer var kjempeglad for både sigeren og at ho er tilbake etter skade med påfølgjande operasjon i vår. Ho fekk ei avriving i hamstringsmuskelen i påska og var redd heile sesongen skulle ryke.
– 15. mai skar dei opp heile låret og skrudde fast hamstringen som var roken av. Eg fekk beskjed om at det ville gå seks månader før eg var tilbake, og eg var veldig lei meg, sidan eg hadde sett for meg ein kjempesesong i år, fortalte Buer til NRK etter løpet.
– Eg får tydelegvis nytte av det eg har bygd opp i vinter og vår, likevel. Eg får ein bonus av det. Eg hadde aldri trudd at forma skulle komme så fort tilbake. Det er heilt fantastisk. sa ho til NRK.
Ned til Merete Helgheim på andreplass skilte det over 4 minutt medan unge Karoline Erdal på tredje var 7 minutt bak. 127 løparar sprang på tid medan resten deltok i trimklassa.
May Britt Buer var glad for å vera tilbake i god form etter eit lengre avbrekk på grunn av skade. (Foto: Christian Prestegård)
| Kvinner | |||
| 1 | Buer,May Britt | Gular | 33:54:00 |
| 2 | Helgheim,Merete | Gloppen friidrettsklubb | 38:13:00 |
| 3 | Erdal,Karoline | Førde Il | 40:52:00 |
| 4 | Hildenes,Elisabeth | Eid IL | 41:34:00 |
| 5 | Eikås,Janne | Jølster IL | 41:39:00 |
| Menn | |||
| 1 | Ludvigsen,Thorbjørn Thorsen | BFG Bergen | 28:24:00 |
| 2 | Tengsareid,Torstein | Egersund IK Friidrett | 28:35:00 |
| 3 | Heiberg Sundby,Øyvind | IK Tjalve | 29:41:00 |
| 4 | Skjervheim,Lars Erik | Voss IL | 30:18:00 |
| 5 | Een,Arild | Voss IL | 31:21:00 |
| 6 | Erdal,Ole Martin | Førde Il | 31:56:00 |
| 7 | Vedvik,Marius | IL Gular | 32:04:00 |
Alle resultat
Løypa i Førde opp er med sine 3,4 km og 700 høgdemeter temmeleg bratt. (Foto: Arrangøren)
Etter å ha teki seg opp både trapper og grusveg ventar eit vakkert utsyn. (Foto: Arrangøren)
