Med sine 3,9 km og 704 høgdemeter er Førde Opp eit av dei heller bratte motbakkeløpa. I år vart løpet arrangert for femte gong, og til saman var 1432 med i konkurranse- eller trimklassen. Det var ein nedgang frå 1697 i fjor, men gledeleg var det at talet på skuleelevar auka. I år fullførte heile 665 elevar frå første- til tiandeklasse.
Målgangen på toppen vart vist på storskjerm ved Førde Rådhus, og ifølgje arrangøren var det minst 1000 menneske som hadde møtt opp ved Rådhuset og som heia på løparane da dei passerte der i starten, før dei tok fatt på stigninga.
I kvinneklassa sette Annie Bershagel frå Tjalve ny løyperekord med tida 30.18. Den gamle var på 31.16 og vart sett av Eli Anne Dvergsdal i fjor. No sprang Dvergsdal på 32.41 og kom på tredjeplass. Toar vart Anita Håkenstad Evertsen frå Øystre Slidre som brukte 32.29.
Annie Bersagel har i både år og ifjor sliti med eit vondt kne, og det gjer at ho ikkje får sprungi så mykje som ho ønskjer.
- Det går stort sett greit for henne å springe oppover, men det er ei utfordring for henne å komma seg ned igjen når ho deltek i motbakkeløp, fortel husbond Øyvind Heiberg Sundby til Kondis.
- Etter Skåla Opp, var kneet vondt ei uke etterpå. No i Førde var det heldigvis råd for henne å få transport ned, så no gjekk det heldigvis mykje betre med kneet. Sjølv om ho må trene mykje alternativt, så er kondisjonen hennar veldig god for tida, fortel ektemannen som sjølv er ein sterk motbakkeløpar, men som i år har satsa mest på sykling.
Herreklassen vart vunnen av Torstein Tengsareid på 25.55. Egersunds-løparan er utteken til VM, og tida hans i Førde Opp var 50 sekund bak løyperekorden til Johan Bugge. Den sette Bugge i fjor da han var i veldig god form og mellom anna tok EM-gull i motbakkeløp. Bugge har i år fått sesongen delvis spolert av skade, men vart no nummer to på 26.19. Tredjemann vart Sindre Hoff, Viksdalen IL på 29.32.
Førde Opp har i løpet av 5 år etablert seg både som ein idrettskonkurranse med god deltaking både i breidde og topp. Samstundes er det ein folkefest i sentrum som sunnfjordingane set pris på, og i løpet av dagen reknar ein med at det er fleire tusen publikummarar som er innom for å sjå på løparane, artistane på scena eller for å kjøpe seg middag på Førde Opp kafé.
Torstein Tengsareid viste god form framføre VM motbakkeløp da han vann Førde Opp med god margin. (Foto: Stig Roger Eide)
Kvinner | |||
1 | Annie Bersagel | IK Tjalve | 30:18 |
2 | Anita Håkenstad Evertsen | Øystre Slidre | 32:29 |
3 | Eli Anne Dvergsdal | IL Gular | 32:41 |
4 | Merete Helgheim | Gloppen friidrettslag | 34:55 |
5 | Bodil Ryste | Gaular IL | 37:28 |
6 | Norunn Stavø | Flora TIF | 38:24 |
7 | Ane Brekke | Førde IL | 39:42 |
8 | Ingrid Lefdal | Førde | 40:16 |
9 | Wenche Molland | AKS 77 | 40:27 |
10 | Anne Therese Kusslid | Førde IL | 40:31 |
Menn | |||
1 | Torstein Tangsareid | Egersunds IK | 25:55 |
2 | Johan Bugge | Eidsvåg Il | 26:19 |
3 | Sindre Hoff | Viksdalen IL | 29:32 |
4 | Roger Øye Pollen | Førde IL Langrenn | 30:45 |
5 | Sverre Nesdal Aske | Fjellhug Vereide | 31:03 |
6 | Ingvar Skaar | Lavik IL / Statoil BIL | 31:04 |
7 | Odd Rognebakke | Opp med Dampen | 31:53 |
8 | Per Eivind Gurvin | Førde IL | 32:17 |
9 | Gisle Skjølberg | Bremanger Idrettslag | 33:08 |
10 | Magnar Solheim | Norddalsfjord IL | 33:24 |
Alle resultat
665 skoleelevar frå første til tiande trinn deltok i årets Førde Opp. Det var rekordmange, og elevane er med på å prege Førde Opp på ein positiv måte. (Foto: Førde Opp / Bit & Byte)
Det var folkefest ved Førde Rådhus der løypa gjekk forbi og der målpasseringa på toppen vart overført på storskjerm. (Foto: Ivar Høyvik, Findriv)