PRESSEMELDING:
Landets aller beste løparar deltok i NM motbakkeløp i Molden Opp, og då opna det seg muligheiter for dei nest beste. I herreklassen var det frå start av ein kamp mellom tre løparar. Andreas Søfteland frå Opptur motbakkeklubb i Os har vist stor framgang dei siste åra og viste seg sterkast den siste delen opp mot toppen. Søfteland vart klokka inn på 36.23, snautt halvanna minutt bak løyperekorden til Ketil Monssen på 34.59. Bak følgde Ørjan Nilsen (Varegg) med 37.03 og Mats Mollandsøy (Bergen løpeklubb) på 40.50.
Beste lokale løpar vart Roy Dyrkolbotn frå Mjøsdalen med 43.37. Han har vore litt mindre aktiv på løpsfronten dei siste par åra, men trong ikkje mange sekunda før han fekk igjen pusten og småsprang nedover fjellsida, truleg i retning neste fjelltopp. Gularjenta Caroline Angeltveit vann dameklassen suverent på 47.07. Her hadde Elise Vikne frå arrangørklubben Osterøy IL knallsterke 39.59 i rekordåret 2014. Svært få dameløparar i landet er i stand til å matcha den tida.
Den tette skodda på toppen løyste seg heldigvis opp då konkurranseløparane kom. Superlativa hagla om utsikta og løypa.
- Klart eg kjem igjen. Eit kjempeflott løp. Eg gler meg til neste år, slo herrevinnar Andreqas Søfteland fast.
I fjor vart Bruviknipa Opp avlyst på grunn av mykje snø, men i år var det knapt ein fuktig flekk igjen i løypa. I år som i 2014 slapp løparane å springa med sekk, noko deltakarane sette pris på. Med si tøffe løype og fantastiske utsikt frå toppen har Bruviknipa Opp eit stort potensiale. Berre 14 deltakarar i konkurranseklassen og 24 i turklassen vitnar om at dette var eit lite kvileår for arrangementet.
Arrangørens heimeside
Resultat i konkurranseklassen:
36,23 Andreas Søfteland, Opptur motbakkeklubb
37,03 Ørjan Nilsen, Varegg
40,50 Mats Mollandsøy, Bergen løpeklubb
42,37 Roy Dyrkolbotn, Mjøsdalen IL
43,38 Espen Irgens Haugen, Fri
47,07 Caroline Angeltveit, Gular
48,50 Frode Øvre-Helland, HSI
49,16 Richard Hestnes
49,23 Jan Michalek
49,45 Martin Håvik
50,34 Richard Bertelsen, Mjøsdalen IL
53,57 Rune Hagebø
54,07 Kim Rune Bruvik, Bruvik IL
59,23 Emilie Knaver
Skodda letta og dei tre beste i herreklassen kunne nyta utsikta. Frå venstre Ørjan Nilsen, Andreas Søfteland og Mats Mollandsøy.
Suveren vinnar i dameklassen; Caroline Angeltveit frå Gular.
Vinnar Andreas Søfteland i fint driv rett før målgang.
Beste lokale løpar, Roy Dyrkolbotn, var nok den av deltakarane som hadde vore flest gongar på Bruviknipa.
