Maryna Novik sette rekord i jubileumsløpet Trongjo Opp

Sterk løyperekord av Maryna Novik, IF Klypetussen
Maryna Novik, med topp ti-plassering både på 5000 og 10000 m under NM på Askøy sist sommer, viste at formen er upåklageleg. 8.00 på 115 m flatt pluss 1635 m reell motbakke på asfaltert veg. Det er "Tour de France"-stigning, altså.

Thomas Finshus, Stegaberg IL er trufast i løpa til IF Klypetussen. Han har løyperekorden i Trongjo Opp på 6.40. No fekk han notert 6.58 i det sure veret (kan henda sprang dei så fort for å koma inn til jubileumsfeiring i varm gymsal på Sævareid skule etterpå). Thomas kom sjølv om han var litt indisponert av forkjølelse. Det er slike folk som bidreg til at arrangører held på år etter år.

IF Klypetussen 35 år 2. april
Det 52. Trongjo Opp gjekk nøyaktig på 35-årsdagen til arrangørklubben. 63 deltakarar i det sure veret er absolutt godkjend. Sju sykla, 20 sprang og 36 trimma.

Neste løp i jubileumsåret er Trongjo Ned sundag 30. april. Det er same løypa omvendt veg med start ved E-134 i Etne. Men i tillegg går det 650 m nede på flata ved Stordalsvatnet.

Tredje og siste løp i Klypetuss-karusellen heiter Bjørkeklubben Over og er 1270 m flatt langs Stordalsvatnet. Det går 21. mai, med fest og premieutdeling på Frette ved målsnøret.

Thomas Finshus, Stegaberg IL, sterkt løp - med forkjølelse. 3. september er han sjef for Sluseløpet i Skjoldastraumen. Foto: Olav Samland

Klypetuss-karusellen også for trimmarar. Foto: arkivbilde