Suten opp i Vik
Løyperekord til Ludvigsen to dagar på rad
I dag var det den bratte Sutastigen i Vik i Sogn som var målet for Thorbjørn Thorsen Ludvigsen. Trass i at det var enkeltstart og han var nummer 16 i rekka, var han førstemann til toppen, og løyperekorden vart slegen med over eit minutt. Og dette skjer dagen etter at han har slått sin eigen løyperekord i Løvstakken opp.
16:28 vart rekordtida til Thorbjørn Ludvigsen i hans debut i det bratte løpet i Vik. Det var ei fin løype, meinte han, og ho passar godt som trening til dei internasjonale fjelløpa han skal vera med på seinare i sommar, bortsett frå at dei er mykje lengre. Han har trena mykje på ski i vinter, og så langt ser det ut til at dette har vore vellukka.
Lina Rivedal, som er frå Vik og bur i Bergen, var raskast av damene med 23.52. Ho har tidlegare vunne Suten opp på 24.22.
Frå Øyri i Vik og til Skorge, 502 meter over havet, går det ein smal sti, til dels teknisk vanskeleg. Utsikta frå Sutastigen, for dei som har tid å nyta ho, er upåklageleg, sjølv om sjølve innkomsten ligg litt innpå platået.
Det var gode forhold i løypa denne dagen, nokså tørt og fint.
Dette løpet er det første i Vikjatrippelen som består av Suten opp, Mensen Ernst minneløp og Vidasete opp. Du finn meir detaljar om desse i Terminlista.
Annonse
Beste resultat:
Menn:
1. Thorbjørn Thorsen Ludvigsen 16:28
2. Leif Bjørn Grindedal 19:12
3. Joar Grov Turvoll 20:09
Kvinner:
1. Lina Rivedal 23:52
2. Ane Brekke 24:04
3. Anne Brekkhus 24:51
