Svinestrandløpet 22. juni

Dette er god kondisjonstrening og god trening til vinteren, seier han, som satsar på langrenn og skiskyting.
(artikkelen er saksa frå lokalavisa Firda Tidend)

Med to kilo tunge sekkar på ryggen la 37 løparar i veg då startskotet gjekk ved Gloppebua laurdag føremiddag. Seks unge løparar starta samtidig frå Austrheimstøylen med mål om å nå Svinestranda på kortast mogleg tid. Dei som var med i mosjonsklassa, kunne velje om dei ville starte på Sandane eller ved støylen.

Ole Martin Erdal stilte til start for andre gong. I fjor vart han nummer tre totalt. Denne gongen klatra han heilt til topps.

– Det var litt overraskande. Vi var fire-fem personar som kjempa om sigeren. Då eg passerte støylen, var eg i grunn i bra slag. Og då vi nærma oss toppen, såg eg at eg kunne klare å vinne. Det var moro å lukkast. Temperaturen i dag var perfekt. Litt sleipt i løypa var det einskilde stader, men forholda var likevel gode. Det var ikkje skikkeleg bløtt, fortel han.

20-åringen har gått på Norsk toppidrettsgymnas på Geilo for å kunne satse på langrenn og skiskyting.

– Målet er ein gong å få delta i verdscupen i skiskyting. Nålauget er trongt, det veit eg, men eg håpar på å kunne stabilisere meg på eit høgt nivå om to-tre år. No studerer eg økonomi ved Høgskulen i Lillehammer og skal til på tredje året. På Lillehammer er det stabil vinter og gode treningstilhøve, seier han, som no brukar sommarferien på trening og jobb.

Merete Helgheim frå GFIL var også i år den raskaste kvinna i Svinestrandløpet. Ho sette løyperekord i 2010 med tida 62,10.

– Det gjekk greitt i dag, men det var litt tyngre enn tidlegare løp. Eg prøvde likevel å halde ein jamn fart. På dei brattaste plassane gjekk eg. Eg var nesten to minutt bak rekorden, så eg må ha gjort eit veldig godt løp i 2010, seier ho.

Vi har fått denne serien med bilete frå Svein Hjelmeset:

Svinestrandsløpet 2013.wmv

Resultata er henta frå sidene til Fjellhug/Vereide (arrangør)