Gode vinnartider på alle distansar i Karmøy Maraton

Da Karmøy Maraton vart arrangert for tiande gong i fjor, fullførte 387 løparar dei tre hovuddistansane. Med 561 i år var det ei auke på heile 45 prosent. Deltakarrekorden på 484 frå 2019 vart òg slegen med god margin. I tillegg til dei tre hovuddistansane blir det òg arrangert barneløp, som i år hadde 208 påmeldte.

Karmøy Maraton er rett og slett vorti eit populært haustløp som har solid fotfeste i lokalbefolkninga og i tillegg trekk til seg ganske så mange tilreisande. Og det skuldes ikkje at traseane er paddeflate rekordløyper eller at haustvêret på Karmøy alltid er av det snille slaget.

I år blas det godt over 10 m per sekund i kasta, og fekk ein motvind og motbakke samstundes, så fekk ein ei kjensle av å stå mesta stille. Bakkane er imidlertid ikkje så lange, og den litt rullande løypa gir ei fin avveksling. Temperaturen var heilt grei med 5-6 grader og stort sett opphaldsvêr.

10 kilometeren vart vunnen av landets beste hinderløpar gjennom mange år, Tom Erling Kårbø. No viste han god grunnform med å springe 10 km på 31.15. Tida ville til samanlikning heldt til ein 52. plass i Hytteplanmila tidlegare i haust, men Kårbø ville nok sprungi ganske så mykje fortare om han hadde vori med der. Kårbø har 29.24 som pers på 10 km gateløp.

HIL-løparen Morten Gjendem sprang òg bra og var berre 11 sekund bak Kårbø. Kvinneklassen vart vunnen av 15 år gamle Tuva Alme frå Sandnes som sprang på 36.23. Nora Markhus sneik seg òg under 40 minutt med 39.47.

Av sterke veteranprestasjonar kan vi trekkje fram den gamle storløparan Oddmund Roaldkvam som no vann klasse 65-69 år på 39.21.

Tom Erling Kårbø frå Stord (til venstre) og Morten Gjendem frå Haugesund låg side om side ut frå start, og dei var òg dei to første i mål. (Foto: Kristian Gautesen)

Tuva Alme frå Sandnes er berre 15 år, men vann 10 kilometeren med god margin, på pene 36.23. (Foto: Kristian Gautesen)

Både 10 km og halvmaraton er fram-og-tilbake-løyper, og her får Nils Haktor Bua til ei særs god vending. (Foto: arrangøren)

Silje Torsvik og Tedros Haile vann halvmaraton

Òg på halvmaraton var det godt nivå i både kvinne- og herreklassen. Silje Torsvik som spring for Stavangerklubben Spirit var raskast av damane med 1.19.09 medan klubbvenninne Helene Hope vart nummer to halvanna minutt bak.

Tedros Haile tok ein enda klarare siger i herreklassen med 1.09.40. Finn Isaksen frå GTI på andreplass var nummer to på 1.12.22. I alt sprang elleve menn under 1.20 og seks kvinner under 1.30.

Silje Torsvik (652) som vann halvmaratonløpet, var ei av mange Spirit-løparar som stilte til start på den grønne friidrettsbanen på Kopervik. (Foto: Kristian Gautesen)

HIL-løparen Tedros Haile kom tilbake til stadion med god margin bak til konkurrentane. (Foto: Kristian Gautesen)

Halvmaratonfeltet var det klart største med 305 som tok seg til mål. Dei 300 første og siste metrane vart sprungi på den oppgraderte løpebanen. (Foto: Runar Gilberg)

Dyrkolbotn og Laputjov på maraton

Maratonløpet går i ein stor runde rundt heile den sørlege delen av Karmøy. Raskast av dei 81 mennene, var Pavel Laputjov som sprang på 2.33.13. Laputjov er 40 år og sprang tidlegare i haust Amsterdam Marathon på 2.26.21. Med tanke på at det no vart sololøp i ein god del vind i ei mindre flat løype, så var nok ikkje Karmøy-prestasjonen så mykje svakare.

Bak Laputjov følgde ikkje mindre enn fire Spirit-løparar med Henning Tjøstheim som den beste på 2.39.06. I alt sprang åtte mann under 3 timar.

Det gjorde ingen kvinner, men Randi Marie Dyrkolbotn vann på 3.11.27 med Johanna Åland på andreplass 8 minutt bak. Junioren Silje Vaule Milenkovic vart nummer tre på 3.20.16.

Pavel Laputjov var dagens klart raskaste maratonløpar. (Foto: arrangøren)

Randi Marie Dyrkolbotn (108) som vann maratonløpet, ligg her bak unge Silje Vaule Milenkovic (57) som til slutt vart nummer tre. (Foto: arrangøren)

Alle resultater