Klart for Osterøy på tvers for fjerde gong
Laurdag 6. juni er alle fjellgeiter inviterte til «Osterøy på tvers» for fjerde gong. Også i år ser vêrgudane med blide augo på arrangementet. Det ligg an til over 300 deltakarar, og kanskje ryk deltakarrekorden på 330.
Publisert
Tidlegare år har løypa og opplegget fått svært gode tilbakemeldingar. Nytt sjansen til å oppleva fjell og fjord og små idylliske bygder på Osterøy!
Tur- og fjelløpet startar på Bruvik kai og går 21,1 km over fjella til Hosanger med målgang ved Mjøsvågen Landhandleri. Her blir det «Osterøy på tvers-meny», premieutdeling og sosialt samvere for deltakarar og publikum. Turen blir ein spennande kraftprøve i vakker natur uansett om ein går eller spring. Mange av deltakarane kjem utanfrå kommunen, og arrangementet er fantastisk Osterøy-reklame.
Løypa går i hovudsak på sti, men er også innom skogsvegar, grus og asfalt. Sjeldan har ei løype fått meir skryt! Den er tøff og variert med rundt 1300 høgdemeter. Løypa er innom Borgasetra, Njåstad, Myking og toppen av Tveitafjellet (556 moh), før den går ned mot idylliske Hosanger ved Mjøsvågen.
Informasjon om løpet på Facebook
Løypekart Osterøy på tvers
«Osterøy på tvers» er eit samarbeidsprosjekt mellom fire idrettslag; Osterøy, Mjøsdalen, Fotlandsvåg og Bruvik. Arrangøren har sett opp bussar frå Hosanger til Bruvik før start, men ein kan også parkera bilen ved kyrkja på Bruvik. Det blir organisert transport av tøy og bagasje frå start til mål.
I 2024 sette Jan Tore Tellefsen og Silje Oksholm Arnøy sterke løyperekord med 1.55,30 og 2.12,54. Regn den siste tida har gjort løypa litt meir utfordrande enn dette året, men vêrmeldinga på sjølve løpsdagen ser altså svært lovande ut. Førebels manglar dei heilt store kanonene på deltakarlista, så her kan det vera gode sjansar for dei nestbeste til å koma på pallen.
Det er både turklasse og konkurranseklasse med vanleg aldersinndeling. Turklassen har fleksibel start før klokka 9 om morgonen, konkurranseklassen startar klokka 11. Påmelding og tidtaking ved Eqtiming. Det blir gåvekort frå Sport 1 Åsane til dei tre beste menn og kvinner og laks frå Lerøy til klassevinnarane. I turklassen blir det trekt ut premiar på startnummer. Delar av overskotet frå arrangementet går som før til Barnekreftforeningen.
Ved spørsmål: kontakt Bjarte Vik (bjartevik30@hotmail,456 02 908) eller Øystein Øvsthus (oystein@mjosmetall.no, 952 20 456).
