Marius Vedvik – klar for sesongopning

Marius Vedvik

Alder: 32 år
Bustad: Førde
Klubb: Førde friidrett 
Yrke: Online treningsvegleiar og vikarlærar 
Trener: Meg sjølv
Persar: 3.44,04, på 1500, 7.53,01 på 3000 m, 13.29,46 på 5000 m, 28.42,15 på 10 000 m og 1.04.14 på halvmaraton
Merittar: 10 individuelle NM-gull: 1 på 1500, 2 på 3000, 2 på 5000, 2 på halvmaraton, 2 i terrengløp kort løype og 1 på maraton, nordisk gull 10 000 m (2014), bronse nordisk terrengløp (2016), 14. plass EM 10 000 EM (2014), 15. plass EM innandørs 3000 (2017), 3 sigrar i Oslo Maraton (2016, 2018 og 2022), 5 sigrar i Holmenkollstafetten med Gular (2013, 2017, 2018, 2019 og 2022), 1 siger i Sentrumsløpet (2017)
(Foto: Arne Dag Myking) 

Artikkelen har stått på trykk i Kondis nr. 3-2025

Tolv sesongar i Gular lærte meg viktigheita av Holmenkollstafetten som ein samlande og motiverande faktor for idrettslag og bedrifter. Det var veldig kjekt å vinne Holmenkollstafetten fem gonger med Gular, men Holmenkollstafetten er viktig for så mange andre enn det aller beste laget.

Vi starta så smått med eit herrelag i Førde i fjor, og vi stiller igjen i år. Vi er i seniorklassen, og dersom lesaren ønsker å følge med på korleis det går med Førde på Holmenkollstafetten, setter vi stor pris på det. Vi brukte 56 minutt og 27 sekund i fjor på dei 15 etappane og ønsker å bruke vesentleg mindre tid i år.

Hard og mykje trening

For min egen del har treninga i april vore svært bra. Det ser ut som det blir rundt 750 km totalt sett i april, noko som er rundt 170 km i veka i snitt. Spesielt to veker skil seg ut. Veka mellom 7. og 13. april er sannsynlegvis den hardaste treningsveka intensitetsmessig eg har hatt nokon gong:

Måndag 7. april
FM: 5 x 5 minutt 3.15-3.08/km, 3,8 i laktat.
EM: 12 x 400 + 8 x 300 meter. Snitt 68,1 og 49,6. 5,6 og 6,7 i laktat.

Onsdag 9. april
FM: 6 x 4 minutt. 3.13-3.06/km. 4,7 i laktat.
EM: 10 x 1000 meter snitt 3.01,9. 3,0 og 3,9 i laktat.

Laurdag 12. april
FM: 4 x 600 + 4 x 300 + 4 x 200 + 4 x100 meter. 1.35,96 – 46,90 – 30,3 – 14,6. 13,8 i laktat etter 600 meter og 15,0 i laktat etter 300 meter.
EM: KM terrengløp Sogn og Fjordane. Gull på 3 km. Målte 11,7 i laktat etter løpet.

Totalt sett vart det fem intervalløkter med ganske høg intensitet og ein konkurranse. I alt 170 km. Eigentleg for hard trening utifrå plan, men berga meg nok på at intervalløktene ikkje var så lange. Veka etterpå sprang eg 22 km lenger totalt sett (192 km), men da var intensiteten vesentleg lågare totalt sett sjølv om laurdagsøkta var hard med 16,3 i laktat.

Det er viktig å presisere at så hard trening eigentleg ikkje er å anbefale, men eg lever livet som fulltidsutøver no inn mot sesongen, og då toler ein meir trening enn dersom ein bruker mykje energi på andre ting. Uansett kjem eg til å roe ned intensiteten sjølv også framover. Treninga fram mot min 14. friidrettssesong kan du følge på Strava.

Påske i Bergen

Påskehelga tok eg turen til Bergen for å trene med mine Gular-venner. Etter tolv sesongar i Gular og over ti år i Bergen føler eg meg framleis heime i Bergen, og det er alltid kjekt å treffe gjengen.

Laurdag formiddag sprang eg 5 x 600 + 6 x 300 meter med Tore Akerlie og Christian Lothe. Her har eg på mitt aller beste sprunge på 1.33 på 600 og 44 på 300 med 11-12 i laktat, mens eg denne laurdagen sprang på 1.36 og 45 med 16 i laktat. Eg hadde no ein ganske tung dag, men gjennomførte fint.

På kvelden sprang eg 10 x 600 meter på rundt 2 minutt med Ivar Stefansson og Daniel Beeder på Skansemyren. Her hadde vi god kontroll og målte låg laktat (1,3).

Søndag formiddag vart det dryge 22 km med Daniel Beeder og Jarand Blom i Bergen City Marathon-løypa. Eg er fascinert over kor populært dette løpet har blitt gitt den kuperte traseen, men noterer meg at mange er like mykje på jakt etter opplevingar i ein nydeleg by som tider og personlege rekordar. Det er eit vegen er målet-spesifikt løp.

Veka etter treningshelga i Bergen starta bra med 10 x 4 minutt og 20 x 400 meter tysdag 22. april med god kontroll. Spesielt 10 x 4 minutt-økta på tysdag var noko av det betre eg har levert på intervalløkt i år. Då tenker eg spesifikt på forholdet mellom fart og laktat.

Torsdag 24. april var vesentleg tyngre, men trenden er god, og det har blitt gradvis betre dei siste vekene. Summen av mars og april har vore bra treningsmessig, og eg har skapt eit godt grunnlag for å få ein god sesong.

Holmenkollstafetten

Konkurransemessig blir det nokre lokale løp i starten av mai før Holmenkollstafetten 10. mai. Målet for Førde på Holmenkollstafetten må vere å springe 2 minutt fortare enn i fjor, så vi siktar oss inn på ei tid under 54.30.

Personleg ønsker eg å bidra så mykje som mogleg på langetappen og siktar meg inn på under 7.30. Etapperekorden eg deler med Senay Fissehatsion på 7.11 frå min beste sesong i 2019 blir hard å slå, men eg skal absolutt springe så fort som mogleg! Den etappen blir også erfaringsmessig ein del påverka av vindretninga, og det kan gå 10 sekund begge vegar åleine på grunn av den faktoren. Her handlar det berre om å påverke dei viktigaste faktorane ein kan styre sjølv: god veksling, god løpsdisponering og 100 prosent innsats.

Banesesongen

Etter den korte stafettsesongen blir fokuset retta mot banesesongen. Det er litt uvisst kva løp det blir på starten av sesongen, men hovudmålet er å stille til start på NM 5 km gateløp i Knarvik i juni og NM 10 000 meter på Askøy i august som reell medaljekandidat.

Elles blir det å byggje meg opp til å komme i form til å springe under 8.00 på 3000 meter. Per dags dato er nok 8.10-8.15 rundt nivået eg ligg på, så eg har ein del å jobbe med i tida framover.

Som nemnt tidlegare har eg i 2025 trena vesentleg fleire intervalløkter enn i 2022, 2023 og 2024, og eg er spent på å sjå effekten av dette. Tanken er at ein må øve på å springe fort ofte. Så lenge kroppen toler det, så skal det i utgangspunktet gi framgang i løp.

Den som lever, får sjå.