​Samlar tider på maraton: Har løpt på kvart minutt frå 2.53 til 4.00

Torodd Lybeck
f. 26.7.1952
Pensjonert lærar
Frå Etnedal
Bur på Fagernes

Torodd har løpt maraton på kvart minutt frå 2.53 til 4.00

Med tida 4.00.41 i Tartu skogsmaraton, Estland, nådde Torodd Lybeck (66) eit mål han har hatt i 13-14 år, nemleg å løpe maraton på kvart einaste minutt frå persen sin på 2.53 og opp til 4.00! Løpet gjekk 12. mai.

– 100 maraton var lenge eit mål for meg. Men då eg nådde det i 2010, var eg for lengst i gang med det nye målet, seier Fagernes-mannen til Kondis. – Hausten 2005, 53 år gammal, sprang eg mitt maraton nr. 81, vintermaraton på Jessheim, på 2.56.02. Endå var det langt att til 100, men dei lange løpa på hardt underlag hadde sin pris. Hoftene begynte å plage meg, seier Lybeck.

Fysioterapeut Bjørn Eide på Beitostølen fann ut at eg hadde både artrose og forkalkningar i hoftene. Dermed ga han meg klar melding: Slutt med asfaltløpinga! Du kan gjerne ta ein maraton i ny og ne, men du treng ikkje lenger springe så fort du orkar. Og treninga bør foregå på mjukare underlag – primært på stigar i skogen, alternativt på grusvegar.

Med dette trappa eg ned på løpinga til fordel for ski, triatlon og motbakkeløp. Likevel har eg løpt 33 maratonløp sidan det. Eg hadde 20 løp på tider mellom 2.53 og 2.59, men mangla 3.01. Det tok eg i Oslo året etter. Mellom der og 3.30 hadde eg eit hav av meir eller mindre mislykka løp, pluss nokre tyngre løp som Nordmarka skogsmaraton og Fjellmaraton. Dermed var det ikkje mange «hol» å tette før eg hadde løpt på kvart minutt opp til 3.30.

– Korleis planlegg du løpet ditt for å koma inn på planlagt tid. Stoppar du og ventar før mål?

– Det er fleire som har lurt på det, men nei – det er ikkje så vanskeleg. Eg set opp eit skjema som eg festar til trøya mi. Der har eg skrive mellomtider for kvar femte kilometer, og då går det nesten av seg sjølv. Eg legg opp til jamne løp, men likevel slik at eg kan roe ned litt mot slutten, seier Lybeck.

Han trur at dette i fyrste omgang var med og motivere han til å halde fram med maratonløpinga fram til han hadde passert 100 løp. Etter det trappa han ned endå meir, han har berre 14 maraton dei siste ni åra. I fjor vart det likevel tre: Hamburg på 3.57, Stockholm på 3.58 og Tallinn på 3.59. Fleire år har han ikkje tetta noko hol på lista si: Det einaste maratonløpet han sprang i 2015 var det ekstreme Hardangervidda maraton på 6.15, og i 2017 motbakkeløpet Jungfrau Marathon i Sveits på 4.45.

– Eg tek til å bli innhenta av aldringa. Det går ikkje av seg sjølv lenger å koma inn på planlagt tid. Difor gjorde eg unna tre løp i fjor. I år har eg planlagt to, i fall det skulle bli for tøft å gjennomføre skogsløpet i Tartu på 4.00. Men det gjekk overraskande greitt, så no er eg i mål! Om eg skal halde fram å auke med eitt minutt pr. løp, har eg ikkje bestemt enno. Eg var mykje skada i fjorårssesongen, og innser at kroppen treng mykje meir kvile enn før. Heretter vil eg berre ta eitt løp om gongen. Kanskje skal eg legge på 5 minutt for kvart løp, så får eg sjå om eg kan halde det gåande nokre år til, seier Torodd Lybeck, som fyller 67 til sommaren.

Torodd i eit anna miljø enn maraton. Frå boka "222 fossar i Valdres" som han har gjeve ut på Kvitvella forlag i 2017.

Rangerte maratonløp – Torodd Lybeck