Dynafit Hardangerjøkulen Ultra tilbake for fullt

Start og mål er på Liseth. Løparane på 95 km er innom Rembesdal, Finse, Krækkja og Kjeldebu og løparane må sjølv navigere langs DNT sine stiar ved hjelp av GPS. 34 km løypa føl del den same traseen som ultraen den første delen, men på høgda før Rembesdal skil løypene lag.

Arrangøren Xtremeidfjord er ein frivillig organisasjon og det er lagt ned ein stor dugnadsinnsats av eit fantastisk crew.

Me har med oss lokale sponsorar; Vekselbanken som hovudsponsor og tittelsponsor Dynafit / Vertical Playground som leverer klær til crew og finisherskjorter til løparane.

Deltakar kom syklande frå Korsika

Påmeldingslista viser hovudsakleg deltakarar frå Norge, men også frå Finland, Danmark, Sverige, Frankrike, Sveits, New Zealand, Filippinene, Sør-Afrika, Frankrike og USA.

Me tok ein prat med Pascal Antoniotti, som kom syklande frå Korsika! Pascal hadde lese om Hardangerjøkulen Ultra på Facebook-sida til Norseman og bestemte seg for å delta på 34 km distansen til Hardangerjøkulen Ultra. Slik starta han på den lange reisa frå Korsika 15. juni og har lagt bak seg 2.200 km på sykkel då han kom til Eidfjord. Pascal, 60 år, feira bursdagen sin i Eidfjord dagen før løpet.

Løpet

Kl 7:00 starta løparane på den 95 km lange traseen. Etter at dei var sendt avgårde, var det tid for registrering av 34 km-løparane, som starta kl 11:00.

Vinnaren av 34 km Henning Tjøstheim kom i mål på Liseth etter 3:18 timar og ny løyperekord. På 95 km leda Marjo Liikanen løpet frå Finse og heilt inn til mål og vann løpet på 11:57 timar, noe som er ny løyperekord for kvinner.

På sjekkpunkta Finse og Krækkja er løparane innom turisthyttene til DNT og me er veldig takknemlig for all den gode hjelpa me får. Løparane skryt uhemma av mottakinga på sjekkpunkta. Det var så god stemning ved sjekkpunkt at det for enkelte nesten var umuleg å motstår fristinga å ta lengre stopp enn strengt tatt nødvendig. I Rembesdal, Finse, Krækkja og Kjeldebu har me crew og Røde Kors som tar vare på sikkerheiten, serverer mat og drikke og heier løparane framover i løypa. Bakerst har me crew som følgjer etter og passer på at sikkerheiten er ivaretatt for løparane.

På Liseth Pensjonat & Hyttetun, som er basen vår denne helga, var det god stemning og alle løparane vart tatt imot med flaggborg og heiarop. Utover natta var det tid for å dele gode historiar frå løypa rundt bålpanna og løparane som kom inn etter å ha gjennomført 95 km løypa tok seg tid til ein prat saman med andre løpara og crew før ein god dusj og seng var godt for slitne kroppar.

Resultater Ultra 95 km

Resultater 34 km