Thomas Fremo spring fort på heller lite trening

Intervjuet har stått på trykk i Kondis nr. 6 - 2020

– Ei stund trudde eg at eg flaut på gamal trening, fortel den tidlegare skiløparen på telefon frå Rissa i Trøndelag.

– Men sia eg har vorti gradvis betre etter kvart som eg har auka mengda, er det nok det eg gjer no – og berre i mindre grad deg eg gjorde da eg satsa på ski – som gjer at det går såpass radig unna.

Thomas Fremo er 32 år, og det er 10 år sia han la opp som skiløpar. Da var han så god at han var med i U23-VM i langrenn. Han og Niklas Dyrhaug var like gamle og begge rekna blant dei aller mest lovande. Men Thomas sleit med mageproblem og fekk av den grunn ikkje trena det som var naudsynt for å hevde seg heilt i toppen som senior. Men før han la opp, rakk han å få med ein tolvteplass frå senior-NM.

1.13.38 på fint lite trening

Frå 2010 til 2013 trena han veldig lite, men han dreiv med litt terrengsykling i fritida og heldt ein slags grunnform. Hausten 2013 fann han ut at han ville prøve seg på halvmaraton i Trondheim Maraton, og med fint lite løpetrening sprang han på 1.13.38 og vart nummer to.

– Det var veldig artig og inspirerande. Eg har alltid likt å springe, og hadde det vori like mykje blest omkring løpinga da eg var i tenåra som det er no, så trur eg at eg fort kunne satsa på løping i staden for langrenn. Men den gongen var det på ein måte ikkje noko alternativ, fortel Thomas og legg til at han likar det målberre ved det å springe.

– Når eg konkurrerer, er det meir ein konkurranse mot meg sjølv enn mot dei andre. Persar eg og blir nummer fem, er eg mykje meir fornøgd enn om eg vinn, men hamnar bak persen.

Denne innstillinga har gjort at han har forbetra bestetida si på halvmaraton med 8 minutt sia han starta opp i 2013 – trass i at det eitt år vart veldig lite trening på grunn av husrestaurering, og at ein annan sesong vart prega av skade og veldig lite trening.

– Samstundes gjer nok det at eg likar å sjå framgang, at eg ikkje kjem til å springe så mykje, når resultatpila tek til å peike nedover. Da finn eg nok heller på noko anna – som eg kan ha framgang i.

Fridykking og friluftsliv

Når eg spør han kva det skulle vera, trekk han fram fridykking som ein ting han har lyst til å teste seg ut i, men som han ikkje har tid til å halde på med no.

– Friluftsliv og aktivitetar saman med ungane vil nok òg få større plass.

Men på den tilmålte plassen han har gitt treninga – 6-7 timar med 7-8 mil springing i veka – har han kommi på eit nivå mange aldri når, sjølv med langt større dosar.

– Da eg kom i gang med springinga etter Trondheim Maraton i 2013, prøvde eg å få til ein maraton – 42 km springing – i veka. Etter kvart vart målet 60 km, og no prøver eg å komma opp i 80 km. Framgangen har kommi takt med at eg har auka mengda, og eg trur at eg enno har ein del å gå på.

Thomas er likevel klar på at han ikkje kjem til å gjera noko seriøst forsøk på å ta ut potensialet sitt.

– Nei, familien og jobben har klar prioritet. Springinga er berre viktigast av det uviktige. Og sjølv om eg hadde sprungi fortare om eg satsa meir, så er det ikkje sikkert at livet ville ha vorti noko betre. Eg veit kva toppidrett er og har stor respekt for dei som legg opp alt – trening, kvile, kosthald – for å bli så god som mogleg. Det er ein heilt annan kvardag, og sjølv om eg hadde levd slik, er det på ingen måte gitt at eg ville ha vorti noregsmeister av den grunn, seier treningsfysiologen som testar andre på NTNU-labben i Trondheim, men i veldig liten grad gjer fysiologiske testar på seg sjølv.

– Eg tok ein test for to år sia, og med 84 i maks O2 fekk eg ei tilbakemelding om at kapasiteten er bra nok til å kunne springe fort. Difor har mykje av treninga fokus på å utnytte O2-opptaket best mogleg.

Spring med kontroll

Det gjer han ved å variere mellom terskeløkter og målfartsøkter når han to eller tre gonger i veka har kvalitetsøkter på programmet. Ofte avsluttar han også terskeløktene med nokre kortare drag i større fart. Eller at han legg inn ein fartsbit i midten.

– På mølla kan ei hardøkt for eksempel vera 2-3 km i halvmaratonfart følgd av ein bolk med 45/15-trening progressivt frå 10- til 5 km-fart før eg avsluttar med 2-3 km i halvmaratonfart. Eg likar å springe med kontroll på treninga – utan for mykje syre. Da er det lettare å få kontinuitet i treninga og ein jamn god form. Etter veldig harde økter eller konkurransar treng eg lengre tid på å restituere.

– Eg såg på Strava at du hadde ei berrfotøkt. Er det noko du bruker å gjera regelmessig?

– Ja, om sommaren bruker eg å springe berrføtt regelmessig på graset på fotballbanen like ved der eg bur. Om vinteren spring eg på mølla i 3 millimeters berrfotsko. Dette er restitusjonsøkter der eg får trigga dei små musklane i fotbladet, fortel Thomas som i tillegg til springinga prøver å få til ei økt med tung styrke for beina og ei økt med meir generell styrke for heile kroppen kvar veke.

Skigåing er det vorti lite av sia han la opp.

– Springe kan eg gjera rett frå trappa heime medan eg må køyre 15 minutt kvar veg om eg skal gå på ski. Med litt prepping i tillegg så blir det mykje mindre effektiv utnytting av tida. Men eg er med ungane på skitrening om vinteren og er trenar for ei gruppe der, så da får eg godt litt sjølv òg.

Teste seg mot Tønseth

Men før snøen kjem, har Thomas Fremo lyst til å få til ein rask 10 km og nokre gode terrengløp.

– Eg føler eg har ein god del å gå på på 10 km. Eg vonar eg kan få til ei tid under 29.30 i Norgesløpet i starten av oktober. Så snart eg har fått 10 km-persen på plass, er eg klar for å springe meir i terrenget, der eg eigentleg liker meg best. Eg har planar om å vera med på Bråtesten, og sjølv om eg kjem eit stykke bak rekorden til Didrik Tønseth, så er det artig å måle seg mot dei beste å sjå korleis eg ligg an. Tønseth har løyperekorden med 17.15, og ei tid på 18-talet bør eg klare.

Seier Thomas Fremo som valde ein annan veg enn både Tønseth og Dyrhaug, men som har hatt veldig stor glede av idretten likevel. Og framleis trur han at han kan ha nokre gode år som løpar framføre seg.

– Sia eg trenar såpass lite, så trur eg det er eit ganske stort potensial eg ikkje har teki ut. Alderen vil dermed bli ein faktor seinare enn om eg hadde pusha grensene samanhengande sia eg var ung, meiner han.

Eit drag mindre

Men med full stilling, reiseveg, sambuar og tre ungar er tida heilt klart ein knapp ressurs.

– Ja, det gjeld å planlegge og samstundes nytte høvet når det byr seg. Trening er noko ein må ta seg tid til, og når eg har sett av litt tid til trening, likar eg å bruke denne tida effektivt. Eg veit òg at eg treng overskott til livet utanom treninga, og truleg kjem eg lenger med å ta eit drag mindre eller ei økt mindre – i staden for alltid berre å pushe på. Ved heile tida å ha litt å gå på aukar eg sjansen for å få kontinuitet i treninga, filosoferer Fremo.

Så langt har den strategien ført han opp i noregseliten. Vi får vone han ventar med fridykkingsprosjektet i nokre år til.

Thomas Fremo

Alder: 32 år
Bustad: Rissa
Yrke: Utdanna som treningsfysiolog, jobbar som overingeniør på NTNU og i firmaet PAI Health
Sivil status: Sambuar og tre ungar
Klubb: Fjellørn IL
Trenar: Sin eigen
Idrett: Langdistansespringing, dreiv med langrenn til han var 22 år
Persar: 8.18,17 på 3000 m, 14.24,71 på 5000 m, 29.46,21 på 10 000 m, 1.05.27 på halvmaraton (halvmaratonpersen vart sett i fjor, banepersane i år)
Merittar: 6. plass NM 10 000 m, 1. plass Fjellseterløpet, Orkland Energimila og Frostatingsløpet, 3. plass Birkebeinerløpet, kvartfinale sprint U23-VM langrenn, 12. plass sprint NM langrenn

Eksempel på ei treningsveke for Thomas Fremo

Vanlegvis har Thomas Fremo to kvalitetsøkter ei veke og tre kvalitetsøkter den neste. Rekkefølgja på øktene varierer mykje for å passe inn i kvardagen, og hardøktene varierer periodevis ein del både i samansetjing og terreng. Her er eksempel på ei treningsveke med to kvalitetsøkter.

Måndag
Kviledag

Tysdag
8-10 km roleg pluss generell styrke (mage, rygg, hamstring)

Onsdag
Terskeløkt med ca. 10 km draglengde (1000 eller 2000 m) pluss innslag av høgre fart (200 eller 300 metrar) for å krydre

– På denne økta prøver eg å springe så mykje som mogleg så billeg som mogleg. Det gjeld å ikkje kverne, men flyte.

Torsdag
8-10 km roleg pluss eksplosiv styrke / maksstyrke (spenst, knebøy)

Fredag
14 km roleg (4.30-4.20-fart)

Laurdag
20 x 400 m med start kvart andre minutt, progressivt frå 70-66 sekund

– Oppvarming og nedjogging er ein aktiv del av kvalitetsøktene. Med 4-5 km før og etter blir det fort 16-18 km totalt på økta. Og eg dassar ikkje. Bortsett frå første kilometeren på oppvarminga spring eg gjerne i 4.15-fart på både oppvarming og nedjogging.

Sundag
20 km roleg (halvannan time, 4.30-4.15-fart)

I vårform: Thomas Fremo kunne juble for førsteplass i Forstatingløpet i fjor. (Foto: arrangøren)