I tre år har nepalesiske toppløparar reist til Nittedal i sommarhalvåret for å trene. Dette har vorte ein tradisjon som den internasjonale ultraløparen Frode Lein har gjort mogeleg gjennom sitt engasjement som trenar for “Trail Running Nepal”. Frode Lein er med i Nittedal Banquet Racers og saman med engelskmannen Richard Bull organiserer han reiser, logistikk og deltaking for løparar i dei tøffaste fjelløpa i Europa.

Ein av løparane er 38-åringen Bhim Bahadur Gurung (f 1981). Bhim har fleire topplasseringar i ultraløp, men det er motbakkeløp og “skyrunning” som Bhim er spesialist på. Der har han vore i verdstoppen sidan 2016 med noko fråvær grunna krigsteneste. 

I 2016 fekk Bhim stor merksemd då han knuste løyperekorden til Kilian Jornet i “Kima de Italia”. Spanjolen Jornet har vore rekna som verdas beste fjelløpar det siste tiåret. Bak Bhim kom m.a. italienaren Marco de Gasperi som har 6 VM-gull i Mountainrunning.  Bhim har hatt pallplasseringar i mange internasjonale løp som Everest Marathon, Yading Skyrunning Festival, Royal Race Gran Paradiso, The North Face Kathmandu Ultra, Oxfam Trailwalker Hong Kong, Royal Ultra Sky Marathon.

I 2017 vart Bhim nr 2 i Sky Extreme World Cup bak Jonathan Albon frå England (bur i Noreg).

Bhim Gurung bur i Kathmandu der han forsørger foreldre, søsken og barn - med eit stort smil. Bhim har i 17 år jobba som sersjant i den britiske Gurka-styrken der arbeidsplassen har vore land i krig m.a. Syria, Sør-Sudan, Afganistan. Sidan 2013 har han i tillegg vore ein del av friidrettlaget til den Nepalesiske hær.

Frode Lein traff Bhim første gong i 2015 då dei sprang 200 km saman over Himalaya. Då dei var halvvegs blei dei ramma av det store jordskjelvet i Nepal – då var dei berre 20 km frå episenteret. Dei sprang då vidare frå landsby til landsby og varsla om tilstandane via satellittkommunikasjon. 


960pk_Frode Lein og Bhim Gurung.jpg
Her er Frode og Bhim saman utanfor Toppidrettssenteret i Oslo. Frode vil også sjølv delta i Skåla Opp 17. august. For Frode er ikkje 1814 høgdemeter på 8,2 km så ekstremt. Han har verkeleg testa grensene for kva eit menneske kan gjennomføre. Sjå heimesida hans https://exploringthelimits.com

Frode Lein seier til Kondis.no at det også er mogeleg at 22-åringen Manish Tamang kjem til La Sportiva Skåla Opp dersom han får høve til å reise frå Nepal. Manish er frå høgfjella ved Helambu. Frode seier han har stor løpskapasitet med potensiale til å være i verdstoppen, men han har lite internasjonal erfaring. 

1260pk_Manish Tamang.jpg.jpg
Bildet: Manish Tamang har vunne fleire nasjonale løp både i låglandet og i høgder over 4.000 meter. (Foto: Ananta Poudel) 

Det blir spennande å sjå Bhim og Manish i tøff konkurranse med mange topp internasjonale fjelløparar med medaljar frå både VM og EM, inkludert sju nordmenn.

Aldri tidlegare har så mange norske menn med medaljar frå EM og VM i fjelløping vore påmelde til La Sportiva Skåla Opp: Stian Angermund-Vik, Johan Bugge, Thorbjørn Thorsen Ludvigsen, Stian Øvergaard Aarvik, Håkon Skarsholt og Torstein Tengsareid.  Dei får tøff konkurranse frå Andrew Douglas frå GBR og 6 x EM-vinnar i fjelløping Ahmet Arslan frå Tyrkia. Ahmet har også løyperekorden i Skåla Opp på 1.07.06 frå 2012. Også den ferske verdsmeistaren frå Ungdoms-VM i VK Skyrace, Per-Christian Færøvik Grieg kjem til Skåla.

Sherpaer frå Nepal har det siste ti-året gjort ein stor arbeidsinnsats med trappebygging og oppgradering av stien som er løypa i Skåla Opp gjennom Skålasti-prosjektet. No kjem også godt høgdeakklimatiserte fjelløparar frå Nepal for å teste løypa som deira landsmenn allereie har sett sitt varige preg på.

Kondis.no kjem med meir om konkurransen i årets La Sportiva Skåla Opp og då med fokus på dameklassa.