Naturleg nok er det Dimnas store son, Karsten Warholm, som får mest merksemd i forkant av storstemnet på hans eigen heimebane. Warholm møter mannen som er regjerande verdsmeister og har vori verdas beste 400 m-løpar innandørs i mange år, tsjekkiske Pavel Maslak, til duell på nettopp 400 m. Den svensk-norske 800 m-stjernen, Andreas Kramer, stiller òg til start. 

På 3000 m vil Karoline Bjerkeli Grøvdal møte tsjekkiske Kristina Mäki som har 8.51,69 som utandørspers. I utgangspunktet bør ikkje det halde mot Karoline som har sprungi på 8.37,58. Elles er det løparar med pers på over 9 minutt som er å finne på startlista. Den norske innandørsrekorden er på 8.50,26 og tilhøyrer Ingrid Kristiansen, sett heilt tilbake i 1985. Kan den bli slegen no? 

Hedda Hynne har den beste persen på 800 m, men møter to austeuropeiske løparar som har sprungi på 2.02 utandørs. Persen til Hedda er på 1.59,87 ute, medan ho inne har den norske rekorden på 2.01,55. 

På 1500 m for menn er førebels fire norske å finne på startlista - Marius Vedvik, Sigurd Ruud Skjeseth, Ådne Andersen og Moa Bollerød. Best pers av dei påmeldte har imidlertid polske Adam Cerwinski med 3.39,89 og ungarske Balazs Vindics med 3.42,93. 

Duellen mellom Karsten Warholm og Pavel Maslak vil gå direkte på NRK1 fredag med sendestart klokka 18.20. Sendinga på hovudkanalen vil vare i ein halvtime, medan resten av stemnet vil bli sendt på nrk.no. 

Heimesida til stemnet

800-1-hedda-konsentrert-for-start_50D2438.jpg
Hedda Hynne er klar for 800 m innandørs i Ulsteinvik på fredag. (Foto: Bjørn Johannessen) 

Marius Vedvik jubler over gull nummer 2
Marius Vedvik har nettopp kommi heim frå høgdeopphald i Sør-Afrika og er klar til å teste 1500 m-forma innandørs. (Foto: Martin Hauge-Nilsen)