Klare vinnarar i Bondespretten i Etne

Det var kjempeflott haustvær med strålande sol og litt vind da Etne Senter i samarbeid med Etne Event arrangerte Bondespretten på 8 km rundt Trommedalen laurdag 27. september.  Til å vera terrengløp så passa det flott, og dermed gode tider av dei fleste som var med. 

Tom Erik Karlsen har tidlegare vunne løpet, og fekk tidleg ein ledelse på dei andre. Det var ingen som klarte å ta han igjen oppover bakkane frå start, og innover mot mål klarte han å halda avstanden til dei bak. 

Spenninga stod om dei neste to pallplassane. Vikedalsbu Ragnar Austrheim, som spring for Jølster IL, hadde god avstand til Johannes Heien, IL Ternen, etter 3 km. Denne avstanden minka gradvis, og i mål skilte det berre 4 sekundar. 

I dameklassen var det ingen som kunne gjera noko med legane i Etne. Julie Rolland Jacobsen fekk ein klar ledelse frå start, og den auka jamt utover i løpet. 2 1/2 minutt etter i mål kom Idun Øvernes, med Andrea Nesse 9 sekundar bak. 

Alt i alt ei positiv oppleving for dei 32 som deltok i løpet denne dagen.