Åttandeplass til Lars Olaf Haaheim i EM i Skyrace Ultra

EM var lagt inn High Trail Vanoise i Val-d'Isère, og Lars Olaf Haaheim var nummer ni i mål. I tillegg til sju europearar hadde han òg ein kar frå Peru framføre seg.

Lars Olaf brukte 9.33.06 på dei 70 kilometrane med 5400 høgdemeter opp og ned. Fram til vinnaren, spanske Luis Alberto Hernando, var det 1 time og 16 minutt. Samstundes var Varegg-løparen 13 minutt framføre beste dame, Megan Kimmel, som nettopp vann Mont Blanc Marathon. Sia Kimmel er frå USA, vart det nederlandske Ragna Debats som vann EM framøre svenske Mimmi Kotka, som på si side vann 80 kilometeren i Mont Blanc Marathon 23. juni.

43 år gamle Haaheim var godt budd, og ifølge NRK gjorde han unna 29 000 høgdemeter på trening berre i løpet av dei tre første vekene i mai. På Strava-rankinga ligg han på fjerdeplass på den globale lista der det handlar om å samle flest høgdemeter.

Det fekk han god bruk for da han skulle heilt opp på 3653 moh i High Trail Vanoise.

– Løypa var veldig variert, med mykje opp og ned. Det er utan tvil det tøffaste, men og vakraste løpet eg har vore med på, uttala Haaheim til NRK etter løpet.

– For meg er det ikkje eit alternativ å stoppe eller gje seg, men det er sjølvsagt veldig tøft. Men den vakre naturen motiverer meg mykje, heldt han fram.

I alt fullførte 149 løparar langløypa på 70 km. I tillegg var det fleire kortare alternativ utan norske deltakarar.

Det er mogleg å springe fort i fjella sjølv om ein kjem frå flate Nederland. Ragna Debats vann EM sjølv om ho måtte sjå amerikanske Megan Kimmel framføre seg i mål. (Foto: Skyrunner World Series)

Alle resultat

Luis Alberto Hernando frå Spania er vunni det meste han har stilt opp i denne sesongen, og no var han først i mål i High Trail Vanoise i Val d'Isere. (Foto: Skyrunner World Series)