To debutantar vann Bjarte Viks Eliteløp

Løyperekordane var aldri truga, men det vart sett mange personlege rekordar i den 18. utgåva av eliteløpet. Forholda var fine med sol, 12 grader og lett motvind. 58 deltakarar var litt færre enn i fjor, men stemninga før start var likevel upåklageleg.

- Om to år har løpet 20-årsjubileum. Det er same år som Osterøy IL har 100-årsjubileum. Då satsar me på 100 deltakarar, sa løpets grunnleggjar Bjarte Vik i sin tradisjonelle velkomstale før start.

Det danna seg kjapt ein tettrio ut frå start med Magnus E Heggøy (Ask), Jonas Dalland (Gular) og lettbeinte Muse Okube (Osterøy). For alle tre var dette jomfruturen til Bruvik, men dei hadde iallfall fått med seg at løypa var rask og svingete.

Bjarte ønskjer alle velkomen. Om 2 år i 2018 når Osterøy IL har runda 100 år forventar han minst 100 deltakarar (foto: Vidar Simmenes).

Jonas drog frå dei andre og vann
Jonas Dalland hadde nok eit lite favorittstempel, og rundt halveges tok han føringa og drog frå. I mål fekk Jonas 15.33, ei tid han var godt fornøgd med i den 5 km lange løypa. Magnus E. Heggøy frå Ask, som no er tilbake etter eit lite kvileår, kom inn som nr. 2 på 16.10. Eritreiske Muse Okube, som byrja med friidrett i vinter og enno ikkje har kondisjonsgrunnlaget til å halda farten i 5 km, fekk det tungt siste halvdel. Dermed var det fritt fram for arrangørklubbens beste veteranløpar, 43-årige Kjetil Monstad. Han fekk 16.23 og tredjeplass utan heilt å gå i kjellaren.

Jonas Dalland (i midten) vann klart med 15.33, Magnus E. Heggøy (til høgre) fekk 16.10, medan KJetil Monstad (til venstre) fekk 16.23 (foto: Vidar Simmenes).

Den forsmedelege 4. plassen tok Bjarte Vik seg av denne gongen. Han er den einaste som naturleg nok har sprunge alle 18 eliteløpa. Det må nemnast at Bjarte gav skikkeleg gass siste kilometeren inn mot Bruvik for å leggja bak seg Øyvind Loftås. Fri-løparen sprang med dobbel barnevogn. I barnevogna sat dottera Maja og venninna hennar Sofie og kosa seg med rosiner og jus, medan dei småprata og heia på faren. Tida på alle tre vart 17.03.

Øyvind Loftås 17,02 med vogn og 2 småe (foto: Vidar Simmenes).

Marianne Feidje Mjelde vann dameklassen
I dameklassen blei det tre osterøyløparar på pallen. 15 år gamle Marianne Feidje Mjelde hoppar vanlegvis tresteg og spring dei kortaste distansane. Kanskje gjer ho som broren Trygve og går opp på distansar når ho blir litt eldre. Uansett ein fin debut i eliteløpet med førsteplass og 19.57 på Marianne. Mirjam Mjelde har konkurrert flittig i år og gradvis senka persane. No blei det 20.37, seks sekund føre Marianne Kalleklev Haukøy, mor til Gneist sitt store løpstalent Hans Magnus Haukøy.
Etter premieutdelinga var det barneløp og premiering i Bruviktrimmen 2016.

Se flere bilder på Osterøy ILs hjemmeside

Alle resultater: