2.49.41 og norsk årsbeste av Maryna Novik i Karmøy Maraton

Til vanleg har Karmøy Maraton barneløp, 10 km, halvmaraton og maraton på programmet. I koronautgåva i år var det berre to alternativ - 21,1 og 42,2 km. Det var 137 som starta på maratondistansen og ikkje fleire enn 4 braut. Sia løypa er ei rundløype rundt heile den sørlege delen av øya, innbyd ho ikkje til bryting - da ein på eitkvart vis må komma seg til mål uansett. 

På halvmaraton var det 201 påmelde, 171 som starta og 169 som tok seg til mål. Òg her var det sprungi fort i tet med siger til unge Tedros Haile på 1.09.18. Thomas Asgautsen og Ole Mikal Tørsdal leverte sterke løp og vart nummer to og tre på 1.10.01 og 1.10.22.

Silje Torsvik var berre 29 sekund bak løyperekorden til Maryna Novik da ho vann på 1.19.37. Elise Hay Opsahl i klasse 45-49 år vart nummer to totalt med 1.24.41 og Helene Hope nummer tre med 1.30.54. 

Av veteranane elles noterer vi sterk springing av Bente Hellevik som vann 50-54-årsklassa på 1.32.51, og John Nicolaysen som vann same klasse for menn på 1.18.48. GTI-løparen kommenterte løpet og opplevinga slik i Strava-rapporten sin: 

"Overraskende mye bakker. Passering halvveis 39.05, men en god del motvind tilbake, og netto 50 høydemeter, så egentlig negativ splitt." 

Halvmaratonløypa går fram og tilbake siste delen av maratonløypa slik at dei siste 10,5 kilometrane er heilt like for begge løypene. Strava-rapportane melder om ca. 150 høgdemeter med total stigning på halvmaraton og relativt sett noko meir på maraton med rundt 350 høgdemeter - fordelt på eit utal små og nokre få litt større bakkar. Vinden låg stort på 6 m per sekund og kom frå søraust. Det vil seie at heilmaratonløparane fekk motvind 16 km i starten, medvind i midtpartiet og motvind igjen dei 8 siste kilometrane. 

Slik sett er ikkje Karmøy Maraton nokon flat persemaraton, men runden er vakker og inspirerande, og begge vinnarane på maraton vart så inspirerte at dei sette løyperekord. Maryna Novik forbetra Marthe Katrine Myhre sin fire år gamle rekord med over 8 minutt da ho sprang på 2.49.41. Dermed står 39-åringen som spring for Klypetussen, med løyperekorden på både halv- og heilmaraton på Karmøy. 2.49.41 er òg det klart fortaste ei kvinne har sprungi maraton på i Noreg i år. Kathrine Kvernmo toppa før dette løpet statistikken med 2.55.43. 

Holmfridur Adalsteinsdottir kom seg òg under 3 timar og vart nummer to, medan Anne Jorunn Hodne tok tredjeplassen med 3.03.28. 

Heile 4 menn sprang under 2.40 og 17 under 3 timar. Det er sjeldan godt i det som trass alt er ein heller liten bygdemaraton, men det viser nok at mange ivrige maratonløparar var sveltefora på å få springe eit løp, og da Karmøy klarte å gjennomføre, så var dei raske til å melde seg på - og minst like raske gjennom den naturskjønne og varierte løypa. 

Tedros Haile (midten) vann halvmaratonløpet framføre Thomas Aasgautsen (til venstre) og Ole Mikal Tørsdal. (Foto: arrangøren) 
 

Alle resultat


Anja Hoffmann som vart nummer fire på maraton, opplevde snev av førjulsstemning på sin veg gjennom idylliske Skudeneshavn, heilt sør på Karmøy. (Foto: Terje Gilberg) 

Dei aller fleste som var med på årets Karmøy Maraton var rett og slett glade for at dei fekk eit så fint løp å vera med på, i ei tid da svært mange løp er vortne avlyste. (Foto: arrangøren) 


Mange fleire bilete på Karmøy Maraton si Facebook-side