Klart for NM i motbakkeløp på Voss
Laurdag 3.juli blir NM i motbakkeløp arrangert på Voss. Det er det 10.4 km lange Lønahorgi opp som er årets NM-løp. Påmeldingsfrist NM er 29.juni.
Stigninga er 1090 meter med start frå idrettsplassen på Voss. Påmeldingsfristen for deltaking i NM er tysdag 29. juni. Dei som vi starte i konkurranseklassane (utan å telle i NM) kan ein melda seg på heilt fram til helga. Det er også trimklasse utan tidtaking, med start så tidleg at ein rekk til toppen før konkurranseklassen kjem.
Ingressbilete: Guro Tveito var ein av vossingane som deltok i 2009-løpet. Motbakkereporter Christian Prestegård etterlyste då vossingane sjølve i dette løpet, trimklassen talde berre 40 deltakarar. Vi reknar med at dei elles så spreke vossingane tek turen i år, enten i trimklasse eller konkurranseklasse.
Pr. i dag er det påmeldt 130 deltakarar. Mellom dei påmelde er Hans Martin Gjedrem (NM-vinnar i fjor), Morten Eilifsen og Øyvind Heiberg Sundby. Her får det lokale håpet Kristen Skjeldal tøff konkurranse. Kristen Skjeldal har også fått broren Gudmund med.
I kvinneklassen vert nok Anita Håkenstad Evertsen den store favoritten, trass i at dette er det første løpet hennar etter ein lengre skade. Men ho får heilt sikkert sterk konkurranse av jentene som har dominert bakkeløpa det siste året - Merete Helgheim og May Britt Buer.
Arrangøren melder at vossingane må skunda seg, til no er det berre påmeldt 10 vossingar!! Det er rett nok ein tradisjon blant vossingar for å melda seg seint på, men fristen for NM-deltaking går som sagt ut alt på tysdag. Løypa er allereie merka, dei som treng ein prøvetur har sjansen denne veka.
Kondis.no er der i år også. Sjå reportasje frå 2009-løpet her.
 | |
Lønahorgi opp 2009: Merete Helgheim, Gloppen, vann dameklassa på 1.06.53. Foto Christian Prestegård |
