Sterk halvmaratonløping av Pernilla Epland i Venloop

Det var ikkje berre under VM i Valencia at det vart sprungi fort på halvmaraton i helga. På halvmaratonløpet i Venloop i Nederland 25. mars var vinnartida i herreklassen faktisk betre enn i VM. Stephen Kiprop vann på 59.44 medan Geoffrey Kamworor sprang på 1.00.02 da han sikra seg VM-gullet. 

Ein av grunnane til det var nok at det var så å seie vindstille i Nederland på sundag medan det blas friskt i Spania på laurdag. Norske Pernille Epland nytta dei flotte løpsforholda godt og sprang inn til åttandeplass og 1.15.11. Den gamle  persen, sett under Oslo Maraton i fjor haust, var på 1.17.05.

Tida fører 27 år gamle Epland opp på andreplass på den norske halvmaratonstatistikken i år. Berre Karoline Bjerkeli Grøvdal har med sine 1.12.43 frå New York sprungi fortare. 2018 ser ut til å bli eit verkeleg godt norsk halvmaratonår på kvinnesida. Allereie har sju norske kvinner sprungi under 1.20 medan det i fjor var 11 som klarte det på heile året. Går vi tilbake til 2010, var det berre fem norske kvinner som klarte ei tid under 1.20. 

Framføre seg i Venloop hadde Pernilla seks afrikanske kvinner og ei hollandsk. Løpet vart vunni av kenyanske Nancy Kiprop på sterke 1.07.49. Tida ville haldi til ein femteplass i VM halvmaraton. 

- Det var flotte forhold under løpet med 13-14 grader og lettskya vêr. Det var lite vind; værmeldinga sa 2-3 m/s. Det er ei forholdsvis lettløpt løype, sjølv om siste halvdel er litt tyngre, fortel Epland sin trenar, Nils Hetleflåt til Kondis. 

5 km-passeringane til Epland viser at det gjekk litt seinare siste halvdel, enten det var løypa eller steget som vart tyngre: 

17.24 - 17.45 - 18.12 - 18.11

Like bra klarte ikkje Marius Vedvik å halde i hop løpet sitt. Etter ei frisk opning gjekk det stadig tyngre: 

15.02 - 15.36 - 16.11 - 16.26

Dermed kom han eit godt stykke bak persen som han sette nettopp i Venloop for to år sia. Da sprang han på 1.04.15 medan det no vart 1.06.51. 

- Tida var langt bak målsettinga, men eg var ikkje betre i dag, og første 5 km på 15.01 kosta meir enn venta. Eg ser framover mot meir trening og fleire spennande løp i årets sesong, skreiv Vedvik på Instagram etter løpet. 

Tredje norske deltakar i Venloop var Robert Haast som vart nummer 44 i 60-årsklassen med 1.46.23. I alt fullførte 7926 løparar halvmaratonløpet. Det stod òg andre løpsdistansar og turmarsjar på programmet. 

LES OGSÅ: 
Pernilla Epland om bakgrunnen for de gode resultatene (medlemssak)
Tidenes beste halvmaratonår i kvinneklassen siden 1994? (medlemssak)

 

Pernilla Epland hadde ein god dag og persa med mest 2 minutt medan Marius Vedvik fekk det tungt og endte over 2 minutt bak persen. (Foto: Nils Hetleflåt) 


Pernilla Epland har funni seg ein fin plass midt i feltet. (Foto: Nils Hetleflåt) 
 

Alle resultat