Mensen Ernst Minneløp arrangert for 38. gong

Til og med på løpsdagen var det mange som meldte seg på like før start, noko som førte til ei lei utfordring for arrangøren. 150 medaljar var bestillt inn, medan 157 deltakarar stod klare på startstreken.

– Det er eit luksusproblem, og nokre av personane i arrangørstaben ofra lett medaljen sin for at alle dei som kom langvegsfrå skulle få med seg ein medalje heim. Det er faktisk godt å sleppe å brenne inne med nokre medaljar, så kjekt at alle forsvann ut, seier leiaren i friidrettsgruppa Dag Einar Bøtun.
Mensen Ernst Minneløp kan vise til god deltaking, men også ei overvekt av kvinnelege deltakarar for tredje året på rad. På tre av fire distansar var damene i fleirtal. Og spesielt på den lengste distansen (12 km), var kvinnene dominerande, med 9 av dei 11 som fullførte. Totalt var det 157 deltakarar i hovudløpet (4 distansar + stafett), 5 i barnevognløpet og 35 born i barneløpet som gav ein total på 197 deltakarar, rett bak rekordåret i fjor som hadde 203 deltakarar.
– Me hadde rekord-deltaking i hovudløpet, barnevognløpet og på stafetten. Det var kun barneløpet som hadde ein del mindre deltaking enn i fjor. Såleis er me veldig godt nøgde med deltakinga, seier Bøtun, som også hintar frampå at det fristar å bestille inn endå fleire medaljar til neste år.

– Når me blir utsolgt, så får ein jo lyst å auke deltakartaket til neste år, men den største utfordringa er at dei fleste gjerne melder seg på seint. Då me bestillte inn medaljane ein månad før løpet, så var det ikkje meir enn 40 påmeldte. Og ei veke før løpet var det 80 påmeldte. Så det er jo alltid nervepirrande den siste veka.

Mensen Ernst Minneløp har dei siste åra etablert seg som det største løpet i Sogn basert på antal deltakarar. Vinnaroppskrifta meinar dei er enkel.

– Me fokusera utelukkande på rørsleglede, personleg meistring og god stemning. Det er lite fokus på tider, vinnarar og rekordar. Me trur også at det hjelp at me kan tilby fire ulike distansar for alle nivå, frå 1,5 km som kortaste, til 12 km som lengste. Målet vårt er at absolutt alle skal kunne delta, uavhengig av føresetnadar. Basert på tilbakemeldingane me har fått, så føler me at me traff på dette også i år. Mange nøgde deltakarar gjer at det er verdt all dugnadsinnsatsen som blir lagt ned av dei frivillige. Me gledar oss allereie til neste år, avsluttar Bøtun.

Sjå fleire bilete i biletkarusellen øvst i saka.

Arrangementets nettside

Resultater